Asturies recupera ritmu esportador gracies a la siderurxa

Asturies recupera ritmu esportador en dexando atrás les plantes d’ArcelorMittal los problemes pola avería d’ún de los dos fornos altos de Xixón, que llastraron durante la primera metá del añu les ventes de les empreses asturianes nel esterior.

Nel mes d’agostu, les esportaciones de mercancíes d’Asturies algamaron los 464,7 millones d’euros, lo que supón un aumentu interanual del 15%. La cifra representa’l 1,7% del total de les esportaciones españoles, qu’ascendieron a 27.594,9 millones, con un crecimientu del 13,3% al respeutive del mesmu mes del añu anterior, según l’últimu informe mensual de comerciu esterior ellaboráu pol Ministeriu d’Economía, Comerciu y Empresa.

Sicasí, el puxante incrementu d’agostu nun permitió compensar les cayíes de les esportaciones rexistraes n’Asturies nos meses anteriores. El Principáu rexistró un descensu interanual de les ventes nel esterior ente xineru y agostu del 4,6%, hasta los 3.644,9 millones d’euros. Ye la segunda comunidá, detrás d'Estremadura (-7,3%), con mayor cayida. L’informe tamién reflexa que les importaciones nel Principáu asitiaron nel mesmu periodu en 3.441 millones d’euros, un 2,2% menos qu’ente xineru y agostu del añu anterior. Como consecuencia d’esta evolución, el superávit comercial del Principáu d’Asturies amenorgó un 32,8% hasta ponese en 203,9 millones d’euros, frente a los 303,2 millones rexistraos nel mesmu periodu del añu anterior.

Namás nel mes d’agostu, les importaciones del Principáu asitiaron en 414,4 millones d’euros, con un aumentu interanual del 21,3%. Como resultáu d’esa evolución, el superávit comercial del Principáu n’agostu menguó un 19,5% al pasar de 62,5 millones d’euros n’agostu de 2025 a 50,3 millones nel mesmu mes de 2026.

Por sectores, les ventes al esterior de semimanufactures non químiques algamaron los 171,2 millones d’euros (36,8% del total), siguíes de los bienes d’equipu, con 77,1 millones d’euros (16,6%), y les materies primes, con 72,8 millones d’euros (15,7%). Nes importaciones, les materies primes encabezaron les compres del esterior con 124,4 millones d’euros (30% del total), siguíes de los productos enerxéticos, con 94,6 millones d’euros (22,8%), y los bienes d’equipu, con 52,2 millones d’euros (12,6%).

N’agostu, Europa concentró’l 69,4% de les esportaciones del Principáu d’Asturies, con Alemania, Italia y Francia como principales mercaos de destín. Tamién les ventes a esti continente aumentaron un 17% al respeutive del mesmu mes del añu anterior hasta los 322,5 millones d’euros. Les esportaciones con destín a América menguaron un 14,4%, hasta algamar los 70,6 millones d’euros. Esta área xeográfica representa’l 15,2% del total de les esportaciones del Principáu y asítiase como’l segundu destín por volume de les esportaciones.

Tocante a les importaciones, 176,7 millones d’euros proceden d’Europa (42,6% del total), lo que supunxo un aumentu del 20,4% nel mes d’agostu; vien darréu'l continente americanu con 119,8 millones d’euros, un 28,9% del total, con un descensu del 0,7%, con Estaos Xuníos y Perú como principales oríxenes.

EDITORIAL PRENSA ASTURIANA, S.A.U.Todos los derechos reservados